以前曾经听人讲，拳王泰森一企出来，畀人一种感觉就係——天生就该做拳手，当时不以为然。后来年长了，见多了开始相信，明白到好多嘢得靠天赋，正如一个人嘅长相、身材，皆以天生为主，后天培养为辅。正如香港流行乐坛最早升起的一代巨星罗文，佢天生就该唱歌，天生只能属于舞台。

罗文不但情歌好听，而且励志歌仲正，流传更广，如《狮子山下》。喜欢佢嘅歌，由读小学嗰时嘅“半导体”收听、手抄本传阅开始，呢度有佢嘅武侠剧主题曲《圆月弯刀》、励志歌曲《锦绣前程》：“斜阳里／气魄更壮／斜阳落下／心中不必惊慌／知道听朝天边一光新的希望……”；有咗录音机后，佢每首新歌问世我都唔会放过。

难忘1979年除夕，罗文、肥肥等首度光临广州“羊城贺岁万家欢”晚会，我哋终于在电视上一睹佢嘅真容，呢次佢又带嚟咗《小李飞刀》、《好歌献给你》……至今记忆犹新：嗰晚都算係万人空巷啰！从年初一开始，羊城随处飘荡住佢的歌曲：“难得一生好本领／情关始终闯不过……”

一个平素讲话欠缺男性化，甚至“乸乸”哋嘅人，一唱起歌嚟好似换咗人噉——嗰种淡定从容嘅风范，嗰种奔放与澎湃、收放自如的歌声，嗰种处于高音域仍游刃有余嘅本领……再睇下佢演唱时咪头同嘴嘅距离之远，实在无愧于“巨肺”之誉，亦让人明白乜嘢叫做与生俱来咯！更值得称颂嘅係，罗文虽然为此天赋自豪，却唔单只冇丝毫懈怠，反而比别人更加敬业。佢对演唱事业嘅热忱，对每次演出嘅一丝不苟，喺圈中可谓有口皆碑。

我曾深感困惑同惋惜：上天係咪太唔公平啊，罗文嘅阳寿点解咁短？但转念谂下，使佢拥有咁靓嘅歌喉，何尝唔係上天畀佢嘅最大恩赐呢！毕竟佢卒之做到将自己至完美、至爱嘅歌曲一一留畀我哋，永远传颂，亦就无愧于佢所唱、所盼嘅噉样：“生要能尽欢／死亦能无憾”（《绝代双骄》），让自己“活在歌声里”（《好歌献给你》）啦，一个歌手若能如此，夫复何求？